रङ्गीन समय
देवसिंह सुतार
समय रङ्गमञ्च जस्तै चलिरहेको छ ।
किनभने
रातदिन पसिना बगाई ऊ केही जोड्न चाहन्छ
तर
यसलाई अकुत सम्पत्ति भनी महामहिम हिडिरहेको छ ।
समय रङ्गमञ्च जस्तै चलिरहेको छ ।
झोलामा कट्टु ल्याउँदा पनि चेकजाँच हुने
मेरो देशमा
क्विन्टल छिराउँदा
टिङ्ङ बज्ने घन्टी बिग्रीरहेको छ ।
समय रङ्गमञ्च जस्तै चलिरहेको छ ।
धन्य हो मेरो विमानस्थल
विमानको नाममा बेमान भइरहेको छ ।
अस्पष्ट छ अहिलेको
समय
पर्दा खोल्दा सबै छरपष्ट हुने गरी चलिरहेको छ ।
रात र दिनको प्रहर उहिले पनि थिएन र ?
किन समय रङ्गमञ्च भयो अहिले ?
बन्द पर्दाबाट आउँछ एउटा महामहिम
अन्धकार सडकमा हिड्छ
एउटा यात्री
यात्री कुल्चिँदै महामहिम अघि बढिरहेको छ ।
ओहो ! एउटा मनुवा कपाल सेताम्मे हुन्जेल कार्यालय स्याहार्छ
उसले खरको छानो फेर्न नसक्ने भो ।
तर
कपालै नउम्रेको एउटा मनुवा
घरको बाइसौँ तला थपेर अदालत धाईरहेको छ ।
छानविनका निम्ति लिफाफा भर्न पठाउँछ सरकार
महामहिम क्विन्टल समाती दरबार छिरिरहेको छ ।
ऊ बडो-बडो हाकिम हो अरे ।
अश्लील हुर्मत राखी आफैलाई चिनाइरहेको छ ।
त्यसैले त अहिलेको समय
रङ्गमञ्च जस्तै चलिरहेको छ ।
रङ्गमञ्च जस्तै चलिरहेको छ ।
Share to Facebook